Саха сиригэр Британия дизайн үрдүкү оскуолатын сайыҥҥы үөрэҕэ саҕаланна

Арктикатааҕы култуура уонна ускуустуба судаарыстыбаннай үнүстүүтүгэр үс ый болдьохтоох сайыҥҥы оскуола аһылынна. Бу оскуолаҕа көмүс оҥоһуктары айан таһаарар дьону үөрэтиэхтэрэ. Бу тэрээһин быйылгы сомоҕолоһуу сылыгар ананна.

Британия дизайн үрдүкү оскуолатын сайыҥҥы үөрэҕэ Саха сиригэр үс ый кэриҥэ ыытыллыа. Манна уопсайа 20 киһини талан, ураты көмүс оҥоһугу айарга туһуламмыт үөрэҕи саҕалаабыттара номнуо 10-ча хонно.

Соҕурууттан кэлбит уһуйааччылар көмүс оҥоһугу уруһуйдууртан саҕалаан, батарыыга тиийэ барытын сиһилии кэпсээн, көрдөрөн биэриэхтэрэ. Аан дойдутааҕы көмүс ырыынагын билиҥҥи балаһыанньатын билиһиннэриэхтэрэ.

Саха сиригэр көмүс оҥоһугу айыы муҥутуурдук сайдан турар, ол гынан уустар үксүн национальнай моһуоҥҥа охтоллор. Оттон биһиги оҥоһуктарбытын тас дойдуга таһаарарга саҥалыы көрүү, ураты моһуон ирдэнэр курдук. Маныаха ол саҥа көрүүнү, бу үөрэтэр дьон үс ый устата биһиги дизайнердабытыгар иҥэрэр соруктаахтар.

Билигин Саха сиригэр экономика кыра салааларын (креативнай) сайыннарыыга сыал-сорук турар буоллаҕына, Арктикатааҕы үнүстүүт бу соругу толорорго араас ньыманы тобулар.

“Бу оскуоланы биһиги үнүстүүппүт базатыгар бэйэбит тэрийэн үлэлэтэр кыахтаах буоларбытыгар, ыччаттарбытын угуйарбытыгар, уһуйарбытыгар туһалаах буолуо дии саныыбын”, – диэтэ Арктикатааҕы култуура уонна ускуустуба судаарыстыбаннай үнүстүүтүн ректора Саргылана Игнатьева. 

Онон бу тэриллибит оскуола үтүө түмүктэрин аны аҕыйах кэминэн аан дойду үрдүнэн көрөр кыахтаныахпыт. Маныаха Саха сиригэр аан дойду таһымыгар тахсар кыах да, күүс да баар.



Источник: http://nvk-online.ru/saha-siriger-britaniya-dizajn-rd-k-oskuolatyn-sajy-y-re-e-sa-alanna/

 
Поделиться:
Bootstrap tooltips -->